گونئی آزربایجان تشکیلاتلاری امه‌کداشلیق شوراسینین فعالیت پرینسیپله‌ری،
“اؤن یازی”
اورتا دوغودا باش وئره‌ن یئنی ژئوسیاسی-ژئوستراتئژی دییشیکلیکله‌ر، اون ایلله‌ردیر، ایران جغرافیاسیندا، ارتجاعچی، فاشیست، شوونیست فارس‌محورلی رئژیمله‌ر طر‌فینده‌ن باسدیریلان و دونیانین گؤرمه‌زده‌ن گلدییی میللی حرکاتلار گرچه‌یینین، آرتیق، باسدیریلا و گؤرمه‌زده‌ن گلینه بیلمه‌یه‌جه‌ک سوییه‌له‌ره چاتدیغینین آنلاشماسینا گتیریب چیخارمیشدیر.
اؤزه‌للیکله، بو جغرافیانین ان بؤیوک میللی قوروپو اولان آزربایجان میللتینین و دیگر تورک توپلوم و توپلولوقلارینین پتانسیلینی آرخاسینا آلان آزربایجان میللی حرکاتینین، سون اون ایلله‌رده‌کی معظم یوکسه‌لیشی، دیگر میللتلرین ده حرکاتلارینا اؤرنه‌ک تشکیل ائتمه‌سینه وسیله اولموشدور.
بو‌گون گونئی آزربایجان میللی حرکاتینین اورتایا قویدوغو هدف‌له‌ر و سس‌له‌ندیردییی دئویز-شعارلار، یالنیز ایران‌دا یاشایان غیر- فارس میللتله‌ره اؤرنه‌ک اولماقلا و مترقی دونیا اجتماعیه‌تینین دیققتینی آزربایجان میللی حرکاتینین هدفله‌رینه جلب ائتمه‌کله قالمامیش، عینی زاماندا، گونئی آزربایجان تشکیلاتلارینین فعالیت پرینسیپله‌رینین و یول خریطه‌سینین تمه‌ل داشلارینا چئویریلمیشدیر.اله بورادان یولا چیخاراق بیز شورایا عضو اولان و بو سندی قبول ائده‌ن تشکیلاتلار بیان ائدیریک کی؛
گونئی آزربایجان تشکیلاتلاری امه‌کداشلیق شوراسی، اؤز فعالیتینده میللی حرکاتیمیزین آمال و ایدیالارینی، ائله‌جه ده میللتیمیزین سارسیلماز اراده‌سینی سیموولیزه ائده‌ن “آزادلیق، عدالت، میللی حؤکومت” شعاری-دئویزینی رهبر توتار و بو یوکسه‌ک دیه‌رله‌ری تمثیل ائدیر.
پرینسیپله‌ر:
۱- میللی ایدئولوژی‌یا و هدف:
گونئی آزربایجان تشکیلاتلاری امه‌کداشلیق شوراسی تورک میللی مفکوره‌سینین تمه‌ل پرینسیپله‌رینه و آزربایجانچیلیق ایلکه‌سینه سؤیکه‌نیر.
گونئی آزربایجان اراضی بوتؤولویونون توخونولمازلیغینا ایمانی و اوغروندا موباریزه آپاردیغی آمال و ایدئاللاری تاریخی و میللی گونئی آزربایجان جغرافیاسیندا گرچه‌کله‌شدیرمه‌یی هد‌ف‌له‌ییر. عینی زاماندا، فرقلی بؤلگه‌له‌رده یاشایان تورک توپلوم و توپلولوقلارین، او جوله‌ده‌ن قاشقای تورکله‌ری، گونئی تورکمنیستان، خراسان تورکله‌ری و … موقدراتینا بیگانه قالمیر، اونلارین حقوق و آزادلیقلارینی مودافیعه ائدیر.
۲- برابرلیک و وطنداشلیق پرینسیپی:
شورا ایرقیندان، دیلینده‌ن، دینینده‌ن، جینسینده‌ن، سیاسی و مدنی منسوبیتینده‌ن و … آسیلی اولمایاراق، گونئی آزربایجان اهالیسینی بؤلونمه‌ز بیر بوتون اولاراق گؤرور و بو جغرافیادا برابر حقوقلو وطنداش جمعیتینین قورولماسی اوغروندا موباریزه آپاریر.
شورا، گونئی آزربایجان‌دا یاشایان بوتون آزلیقلارین (میللی، دینی، مذهبی و …) حقوقلارینین مودافیعه‌سی و تامینی اوغروندا موباریزه آپاریر.
۳-میللی حاکمیتین گرچه‌کله‌شدیریلمه‌سی:
شورا اؤز اوزه‌رینه گؤتوردویو وظیفه‌له‌ری حیاتا کئچیرمه‌ک مقصدی‌له گونئی آزربایجان‌دا میللی حاکمیتینین گرچه‌کله‌شیدیلمه‌سی اوچون دولت قوروجولوغونو ضروری حساب ائدیر و بو دولتین قورولوش فورماسینی معین‌له‌شدیریلمه‌سینه یالنیز گونئی آزربایجان اهالیسینین آیینه‌م و اراده‌سینی اساس گؤتورور.
۴- دئموکراتیا و پلورالیزم:
شورا، جمعیت قوروجولوغوندا دئموکراتیک دیه‌رله‌رینی وازکئچیلمه‌ز اولدوغونا اینانیر، سیاسی پلورالیزم و فیکیر چئشیدلییینی جمعیتین عوض‌سیز زنگینلییی کیمی دیه‌رله‌ندیریر، گونئی آزربایجان جغرافیاسیندا حقوقون اوستونلویونون تامین اولوندوغو چاغداش، سئکولار و دئموکراتیک بیر جمعیتین قورولماسی اوغروندا موباریزه آپاریر.
۵- جنسیت برابرلییی:
شورا، قادین و کیشی آراسیندا برابر حقوقلولوغون گرچه‌کله‌شدیریلمه‌سی اوغروندا موباریزه آپاریر، قادین حقوق و آزادلیقلارینین هر هانسی بیر( مدنی، میللی، سیاسی، دینی مذهبی و …) گره‌کچه ایله محدودلاشدیریلماسینا قطعی شکیلده قارشی چیخیر.
۶- موباریزه فرمالاری:
شورا، زوراکیلیق و تئرورو قطعی شکیلده رد ائدیر، سیویل و مدنی موباریزه‌یه اوستونلوک وئریر. عینی زاماندا، آزربایجان میللی وارلیغینین و آزربایجان اهالیسینین جان و مال گووه‌نلییینین و … تهلوکه‌ده اولدوغو ضروری حال‌لاردا اؤزونو مودافیعه مقصدی‌له بوتون لئگیتیم واسیطه‌له‌ر‌ده‌ن ایستیفاده ائتمه‌یی مقبول ساییر.
۷- کئچید دؤورونون اداره‌سی:
شورانین باشلیجا هدفی، گونئی آزربایجان جغرافیاسیندا، یالنیز میللی اراده‌نین حاکیم اولدوغو بیر گونئی آزربایجان دولتینی قورماقدان عبارت‌دیر. عینی زاماندا شورا، ایران ایسلام جمهوریتی رئژیمینده‌ن کئچید مرحله‌سینده یارانت بیله‌جه‌ک قئیری-معین‌لیک و کائوسون قارشیسینی آلماق، اونیتار- مرکزیت‌چی یعنی بیر فارس شوونیست حاکمیتین فرمالاشماسینا ایمکان وئرمه‌مه‌ک و میللتله‌رین اؤز موقدراتینی تعیین ائتمه‌سی سوره‌جینی باشلاتماق مقصدی ایله، آزربایجان تورک میللتینین مین ایللیک دولتچیلیک تجربه و عنعنه‌سینه اساسلاناراق، کئچید دؤورونون اداره‌سینه، موستقیل آلتئرناتیو کیمی، طالب اولدوغونا بیان ائدیر. شورا بو مسئولیتی، بو جغرافیادا یاشایان دیگر قئیری-فارس میللتله‌ر و خالقلار‌لا بیرلیکده، اورتاق مکانیزمله‌ر یاراداراق حیاتا کئچیریر. بو‌حاقدا شورانین پلاتفرمو یاخین گله‌جه‌کده یایینلاناجاقدیر.
۸-میللتیمیزین اؤز موقدراتینی تعیین ائتمه حاققی:
شورا یالنیز آزربایجان میللتینین دئییل، ایران‌دا یاشایان دیگر میللتله‌ر و خالقلارین دا، اؤزه‌للیکله، قاشقای تورکله‌ری، گونئی تورکمنیستان، خراسان تورکله‌ری و دیگر تورک توپلولوقلارینین، آزاد اراده‌له‌ری ایله اؤز طالع‌له‌رینی معین ائتمه‌ک حقوقونا حؤرمتله یاناشیر و بو حقوقون دئموکراتیک اساسلاردا رئال‌لاشماسی اوچون گرکلی شرایطین یارادیلماسینی ضروری حساب ائدیر.
۹- شورا آدیندان مذاکره‌له‌ر، آنلاشمالار، راضی‌لاشمالار، ایش‌بیرلیک‌له‌ری و … گونئی آزربایجان تشکیلاتلاری امه‌کداشلیق شوراسینین قراری اساسیندا گرچه‌کله‌شدیریر.
۱۰- شورا، عضو تشکیلاتلارین موستقیلییی پرینسیپینه حؤرمتله یاناشماقلا برابر، یوخاریدا یازیلان پرینسیپله‌رین بوتون عضو تشکیلاتلار اوچون باغلاییجی اولدوغونو بیان ائدیر.
گونئی آزربایجان تشکیلاتلارینین امه‌کداشلیق شوراسی
۱- آزربایجان دئموکرات فرقه‌سی- آ.د.ف
۲- آزربایجان مرکز پارتیاسی- آ.م.پ
۳- آزربایجان میللی دیرینش تشکیلاتی- دیرنیش
۴- آزربایجان اؤیرنجی حرکاتی- آذوح
۵- گونئی آزربایجان جمهوریت پارتیاسی- آ.ج.پ
۶- گونئی آزربایجان دئموکرات پارتیاسی- گادپ
۷- گونئی آزربایجان ایستیقلال پارتیاسی- گایپ
۸- گونئی آزربایجان دولت آلیانسی- م.د.آ
۹- گونئی آزربایجان قورتولوش پارتیاسی- گاقپ
