دونیا آنا دیلی گونو،
گونئی آزهربایجان تورکونون بوتون کیشیسهل و توپلومسال حاقلارینین آراسیندا ان اؤنهملیلهریندهن اولان، اؤز دیلینی دانیشیب، یازیب، اؤیرهدیب، اؤرهنیب، و رسمی اولاراق اؤز رسمی و میللی ادارهلهرینده ایشلهتمهک حاققی، اونا اسیرگهنمیشدیر. بو اینسانا و توپلوما قارشی یاساقلارا ان آز ائلهشتیری و اعتراض، ان آغیر سوچلامالار و سونوجدا ان آغیر ایتگیلهر وئرمهلی اولماقلا جاوابلانمیشدی. گئچمیش ۸۰ ایلده، ایران ایشقال گوجلهری، گونئی آزهربایجانی هر یؤندهن، نیظامی، سیاسی، گئچیمسهل، توپراقسال، و اؤزهللیکله دیل و کولتور یؤنوندهن سالدیرییا اوغراتمیشلار. ایران ایشقال گوجلهری، هر دوندا و هر رنگده اولور اولسون، پهلویلهردهن توتدو تا ایسلامی فاشیستلهرینه و حتی یاشیلجی و یا فئدرالچیلاراجان،هامیسی، گونئی آزهربایجانا و گلهجهک بؤیوک آزهربایجانا آند ایچمیش دوشماندیرلار.
ایندی، ایران دوشونجهسی، آزهربایجان دوشونجهسی ایله رسما قارشی قارشییادیر. نئجه کی تورک دوشونجهسی فادس دوشونجهسی ایله قارشی قارشییادیر. گونئی آزهربایجان، اؤز تورکجهسینه ساریلاراق بو قوتسال بؤیوک آزهربایجان دوشونجهسینی گرچهکلهشدیره بیلهر. اؤزونه، گئچمیشینه، و گلهجهیینه سایقیسی اولان گونئی آزهربایجان تورکونون ان کسگین سیلاحلاردان بیری ده اونون اؤز به اؤز تورکجهسیدیر. بو گوجلو و دهیهرلی سیلاح قوللانیلمالیدیر.
تورکجه بیر سیلاح اولاراق دوشونولمهلیدیر. بو دوشونجه هر گونئی آزهربایجان میللی حرکتچینین تهمهل (Temel) ساواش تاکتیکی اولمالیدیر. ایران ایشقالینا قارشی، هر یؤنده و هر طورلو، دیرهنیش گؤستهریلمهلیدیر. بو دیرهنیش و بو قارشی ساواش، ایران یانلیسی اولان هرکسه و اؤزهللیکله گونئی آزهربایجانی “ایران فئدرال سیستئمی” آدی آلتیندا، و یا ایران تورکلوغو آدی آلتیندا، ایران ایشقالی آلتیندا توتماغا چالیشانلارا آچیلمالیدیر. گونئی آزهربایجان تورکونون قورتولوشو و سعادهتی، یالنیز اونون ایران ایشقالیندان آرینماسیندان، و اؤز باغیمسیزلیغینا یئتیشمهمیشدهن، و بؤیوک آزهربایجانین یارانیشیندان اولاجاقدیر. بو آرزویا و بو سعادهته یئتیشمهک اوچون، دیلیمیز اولان بو گوجلو سیلاحین دهیهرینی آنلامالیییق. ایللهر اؤنجه، بیز گونئی آزهربایجاندا و باشقا تورک یاشایان بؤلگهلهرده، اوخوللارین بیرینجی گونونو اوخولا گئتمهمهغی اؤنهرمیشدیک. بو دوشونجه یاواش یاواش هر سیاسی قوروبون مهنیمسهنمیش تاکتیکینه دؤنموش دورومدادیر. بو دوشونجهنی گرچهکلهشدیرمهک اوچون بوتون سیاسی قوروبلار جیددی اولاراق، ایشبیرلییینده اولمالیدیرلار. بو بیر گونو بیر یئدیگونه (هفتهیه) اوزاتماق، و بو ایلهمی ایشقالدان قورتولماغا گوجلو بیر آراج کیمین قوللانماق اولار. اوخوللاردا و رسمی یئرلهرده تورکجه دانیشماغا و یازیشماغا ایصرارلی اولماق و بونون اوستونده دیرهنمهک و بو ائتگینلیغی اهیلهملهشدیرمهک گرهکلی و یارارلیدیر.
آنالار، “فارسجا بیلمهیهن ساوادسیز اولار و گئریده قالار” دوشونجهسینین بوش و دوشمان و دوشمانا اویانلارین اؤز آنا دیللهرینی اؤیرهتمهکله اونلارا و گلهجهک نسله خیانتده بولونماسینلار.
بابالار، “ائوده تورکجه دانیشیلار” قورالینی اویقولاماقلا، حاکیم فارس میللتینین ائولهره اوزانان ایرهنج ائگهمهنلیک الینی کهسسینلهر. یعنی دوغولان چوجوخلارین آدلارینی تورکجه قویماقدا ایصرارلی اولماقلا، و حتی هر کس اؤز آدینی و یا ایش یئرینین آدینی تورکجهیه دئییشدیرمهک اوچون ایشقالچی دولهتین “ثبت احوال” ادارهسینه گئتمهکله بؤیوک بیر سیاسی دالقا و اَیلهم گرچهکلهشدیره بیلهریک. ایشقالچی میللتین دیلینی ایشلهتمهکدهن چهکینمهک ان بؤیوک میللی و مدنی باش ایمهمهکدیر. ایشقالچی میللتین دیلینده رادیو، تلویزیون، و قازئتهلهری بایکوت ائتمهک و ایلگیلهنمهمهک، گونئی آزهربایجان تورکونون باش بئینینی نؤکر ائدیجی، کؤلهلهشدیریجی و بیر سؤزده فارسلاشدیریجیلیقدان قورتولماغا یؤنهلی گؤتورهر. میللی حرکتیمیزین چالیشانلاری و باغلی اولدوقلاری قوروبلار، هر کس و هامی، تورکجهیه ایراندان قورتولماق اوچون بیر سیلاح اولاراق باخمالیدیرلار، و بو کهسهرلی، دهیهرلی و یارارلی سیلاحین قوللانیش یوللارینی اینجهلهمهلی و بیلمهلیدیرلهر.
کیشینین (اینسانین) ان ایلکهل و ان دوغال حقلهریندهن اولان “آنا دیلی”ندهن بو قدر اؤز توپراقلاریمیزدا محروم قالماق هئچ کیشییه و اؤزهللیکله هئچ تورکه یاراشماز. بو قدر آشاغالیق دوروم کیمسهیه یاراشماز البته. اما، گئچمیش ۸۰ ایلده فارس میللتینین اوستونلوغونو ساوونان “ایرانچیلار”، قوندارما ایران یاراتماقلا و قوندارما ایرانلی میللتی یاراتماقلا، یاواش یاواش تورکو و اؤزهللیکله گونئی آزهربایجان تورکونو تورکسوزلهشدیریلمهغه و فارسلاشدیریلماغا سوروکلهمیشلهردیر.
ایندی، قوندارما ایراندا، ۳۵،۰۰۰،۰۰۰ تورکون اؤز “آنا دیلی”نده بؤیله محروم توتولماسی و بو قدر تحقیر اولونوب اَشاغیلانماسی، هر کسه بیر نرمال دوروم و قبول اولونموش سورهردوروم اولسا دا، دونیا دیلچیلیک بیلیمینه گؤره و دونیا توپلوم و تینتوپلوم بیلیمینه گؤره بؤیوک بیر فاجیعهدیر. گونئی آزهربایجان تورکونون بؤیله ایران ایچینده گون به گون اَریییب گئتمهسی و یاواش یاواش یوخ اولماسی، اینسان تاریخینده اَن بؤیوک ایتگیلهردهن بیری و اَن بؤیوک فاجیعهلهردهندیر. بو “دیلقیریمی” ههمهن سؤیقیریما بهنزهردیر و سونوجلاری دا ههمهندیر. بو بؤیوک فاجیعهنین بیزیم مظلوم میللتین باشینا یاواش یاواش گلمهسی اونون حس ائدیلمهسینی داها چتینلهشدیرمیشدیر. بیر یانداندا فارسلاشدیرماغین و تورک دوشمانلیغینین اؤنده گئدهنلهرین بیر چوخو تورک کؤکهنلی اولماغی بو ایرهنج و قورخونج سورهجی داها دؤزوملو و یوموشاقلاندیرمیشدیر.
گئچمیش یوز ایلده ایران بوتونلوغونو ساوونان و تورک وارلیغینی فارس میللتینین ایاغینا سالان، سؤزده آیدینلارین چوخو تورک کؤکهنلی اولموشلار. یاشاملارینی فارسا و ایرانا آدامیش و تورک دوشمانلارینا سیاسی و یا ادبی ادبیات یارادانلار، ایشقالچی، اردهمسیز، و تجاوزچو فارس اوردوسوندان داها دا بهتهر و داها دا زهرلی ائتگی بیراخمیشدیر. گونئی آزهربایجان تورکونون قارشیسیندا دوران و اونو اؤز “آنا دیلی”ندهن محروم ائدهن، اونون خائین، ساتیلمیش، مانقوت، وطنسیز، سؤزده آیدیندیر. میللی حرکتده، بو قارانلیق یایان اما آیدین گئچینهن تورک کؤکهنلیلهر ان تهلوکهلی عامیللهر اولموشلار. میللی حرکتین چالیشانلاری بو تهلوکهیه دویارلی اولمالی و اونا قارشی دورمالیدیرلار. باشاردیقجا ایشقالچی میللتین دیلی، فارسجا یازماقدان چهکینیلمهلی و هر یئرده تورکجهیی رسمی اولاراق قوللانمالییق. تورکجهیه و اونون بیزه وئرهبیلهجهغی گوجه اینانیب، تورکجه یازمالییق. “آنا دیلی” بیزه هر شئیدهن اؤنهملی و قورتولوشا گؤتورهن یول کیمین گؤرونمهلیدیر. گونئی آزهربایجان میللی حرکتینین فارسا یازان چالیشانلاریندان گؤزلهنتیمیز بودور کی، اؤزلهرینه زحمت وئریب، تورکجه یازماغی و یا دوغرو تورکجه یازماغی اؤیرهنسینلهر. دوشمان دیلی ایله یازماغین و یازیشمانین هئچ بیر بهانهسی یوخدور. گهنهل اولاراق میللی حرکتیمیزین یازارلاری و یازیشمالاری تورکجه اولمالیدیر. اؤزونو آزهربایجانچی بیلهن هرکسین اؤزونه، بو قوشاغا و گلهجهک قوشاغا ان بؤیوک بورجو تورکجهنی قوللانیب گلیشدیرمهکدیر. تورکجه دوشونوب، تورکجه اوخویوب، تورکجه یازماق بیزیم حرکتیمیزین تهمهللهریندهندیر.
بو گون، “دونیا آنا دیلی گونونده”، گونئی آزهربایجاندا ایشقال آلتیندا اولان تورک میللتینین “آنا دیلینین” حاکیم فارس میللتینین الیله یوخ ائدیلمهسینه ایلگی چکمهک اوچون بیر یئره ییغیشمالییق و مظلوم و محکوم میللتیمیزین سسینی هرکسه یئتیرمهلییک. بیز، بو مظلومیتین هارایینی دونیایا چاتدیرمالییق. بیز، تورکجهمیزی یییهلهنمهلییک. یوخسا، ایران-فارس شیطانلیق دوزهنی، قوشاق قوشاق بیزی تورکسوزلهشدیریر، و بیزی اؤزوموزه اؤزگه ائدیر. بیز اویاق اولمالیییق، کی، دوشمان اویاقدیر. گئچمیش ۸۰ ایلده فارس-ایران دوشمانی بیزیم ان اوزاق کندلهریمیزهجهن سیزمیش و بیزی تالان ائتدیکجه فارسجایی آغزیمیزا سوخموشدور و بیزی ایرانلیلاشدیرمیشدیر. بو فلاکتین قارشیسیندا بیز دورمالییق. کیمسه گلیب بیزه بیزیم دیلیمیزی یوخلوقدان قورتارمیاجاقدیر. بو فارس-ایران دئوینین شوشهسی بیزیم الیمیزله تبریز خیاوانلاریندا یئره وورولاجاقدیر. بیز گونئی آزهربایجان تورکلهری، دیلیمیزی فارس پوزقونلوغوندان قورتاراجاغیمیزا آند ایچیریک. آند ایچیریک، گونئی آزهربایجان باغیمسیز اولاناجان، و تورکجه بوتون آزهربایجانین تاریخی توپراقلاریندا رسمی دیل اولاناجان، بو قوتسال ساواشیمیزدان ییلیب یورولمایاجاغیق. آند ایچیریک، فارس-ایران شیطانلیق دوزهنینی دیزه چؤکهردهجهییک و بؤیوک آزهربایجانی قوراجاییق.
یاشاسین گونئی آزهربایجان
یاشاسین تورک
یاشاسین تورکجه!
اوغوز تورک